Урок -путешествие.ГЛАГОЛ.ОБОБЩАЮЩИЙ УРОК

МУНИЦИПАЛЬНОЕ БЮДЖЕТНОЕ ОБЩЕОБРАЗОВАТЕЛЬНОЕ УЧРЕЖДЕНИЕ

«КУБАНСКАЯ ШКОЛА ИМЕНИ СЕРГЕЯ ПАВЛОВИЧА КОРОЛЕВА»

ОКПО 00793035; ОГРН 1159102010033; ИНН/КПП 9109008808/910901001; ОКУД

ул.Мира, дом 32, п. Школьное, Симферопольский р-н, Республика Крым, 297541

тел. (3652) 55-20-87, e-mail: [email protected]

Методическая разработка урока на тему:

«Фииль заманлары. Умумийлештириджи дерс»

Урок - путешествие

Рашидова Эдие Рефатовна

МБОУ « Кубанская школа им.С.П.Королева»

Дерс конспекти:

Сыныф :7

Мевзу: «Фииль заманлары. Умумийлештириджи дерс»

Дерснинъ макъсады: Фииль заманлары акъкъында талебелернинъ бильгилерини умумийлештирмек, текрарламакъ, талебелернинъ агъзавий ве язма нутукъларыны зенгинлештирмек, инкишаф этмек, талебелернинъ сез байлыгъыны арттырмакъ, талебелерде табиаткъа севги чизгилерини тербиелемек.

Шахсий нетиджелер: окъувгъа меракъ, ана тильге севги догъурмакъ.

Метапредмет нетиджелер:

Регулятив УОА: оджа ярдымынен дерстеки макъсадыны тайинлемек;

Мерифет УОА: дерсте берильген малюматнен къулланмакъ, беджерген ишлерининъ нетиджелерини чыкъара бильмек;

Коммуникатив УОА: озь фикирлерни агъзавий я да язма шекильде ифаде этмек, группа ичинде вазифелерни бирликте беджермек, оджа ве сыныфдашларынен эйи мунасебетте булунмакъ.

Предмет нетиджелер: фииллерни чешит заманларда догъру къуллана бильмек, сезлернинъ синонимлерни, фразеологик бирикмелернинъ маналарыны тапмакъ ве догъру къулланмакъ.

Донатма: интерактив тахта, презентация, карточкалар, ресимлер, метинлер дефтер.

Дерснинъ кетишаты:

1. Тешкилий къысым (селямлашув)

2. Мотивация

- Балалар, бугуньки дерсте биз сизден буюк сеяаткъа чыкъаджамыз. Гемиде ялдап, чешит адаларда булунаджамыз. Лякин гемиге отурмакъ ичюн кечирюв весикъаларнынъ суаллерине джевап бермек керек.

(Группаларгъа конвертлер даркъатыла, талебелер агъзавий шекильде суаллерге джевап берелер).

1 группа: Фииль нени бильдире?

Фииль джумледе эксерий алларда насыл вазифени беджере?

2 группа: Фииллернинъ япылгъанына ве япылмагъанына коре насыл шекиллери бар?

Фииллернинъ менфий шекилини япкъан насыл ялгъамалар бар?

3 группа: Фиильнинъ къач дереджеси бар?

Неге фииль дереджелери дейлер?

Оджа: Амма гемини кочюрмек ичюн бир вазифе даа беджермек керек.

Вазифе: Берильген фииллерни таблицагъа толдурынъыз.

Сёзлер: язды, ювуна, сюртти, ачылды, ишлетти, йыкъылды, корюштилер, тапылды, бакъыштылар, толдур.

1. Дерснинъ мевзу ве макъсатларны бельгилев:

Оджа: Мына биз «ТАПМАДЖА» дурагъына келип чыкътыкъ. Шимди берильген тапмаджанынъ джевабыны тапсакъ, берильген вазифени беджерсек дерсимизнинъ мевзусыны бельгилерик.

«Менсиз предметнинъ тек ады бар,

Мен къошулсам арекет башлар.

Къушлар уча, балалар къувана,

Багълар гуллей, джанлана эр шей».(ФИИЛЬ)

Оджа: Догъру, балалар! Энди тахтадаки сезлерни ренклерине коре группаларгъа ерлештирип, суаллер къойып оларнынъ фаркъыны тапынъыз.

Сезлер: Къурулды, отура, язаджакъ, беджере, къапаткъан, йырлай, атты, келир, чалар, агъаргъан, башлай, кетеджек.

Оджа: Бу сезлер бири биринен насыл фаркълашалар?

(талебелер фииллерни учь заманда къуллангъаныны анълаталар, дерс мевзусыны бельгилейлер, оджанен бирликте дерснинъ макъсадыны къоялар)

1. Мевзуны текрарлав

Дефтерде чалышув(санны ве мевзуны язалар).

Ноябрьнинъ йигирми едиси.

Сыныф иши.

Мевзу: «Фииль заманлары. Умумийлештириджи дерс»

Оджа: Бу дакъкъадан башлап биз бераберликте чешит адаларны зиярет этеджемиз. Шимди биз сизден «КЕЧКЕН ЗАМАН» адасында булунамыз.

• «КЕЧКЕН ЗАМАН» АДАСЫ

Вазифе: Метинни окъумакъ, фииллерге суаль къойып, ялгъамаларыны тапып, заманны бельгилемек.

Саба. Кунеш чыкъты. О, пек йылтырады ве къыздырды. Кунеш сувны озенлерден, голлерден бувгъа айландыргъан. Був тёпеге учып кеткен ве булуткъа джыйылгъан. Сонъра ерге ягъмур олып ягъды.

Оджа: - Бу метинде не акъкъында айтыла? (Дюньяда сувнынъ айланувы).

- Фииллер насыл суаллерге джевап берелер, насыл ялгъмалар иле япылгъанлар? Фииллернинъ заманыны бельгиленъиз.

• «ШИМДИКИ ЗАМАН» АДАСЫ

Вазифе: «МОРФОЛОГИК ТРЕНИНГ» (синонимлер лугъатынен къулланып, фииллернинъ синонимлерни тапып, шимдики заманда язмакъ)

Хата япмакъ - янълыша

Гъайып олмакъ - джоюла

Айтмакъ - джевап бере

Афу этмек - багъышлай

Сейлешмек - субетлеше

Корюшмек - селямлаша

Окъумакъ - бильги ала

Чалышмакъ - ишлей

Бакъмакъ - коре

Тез олмакъ - ашыкъа

1. Раатлыкъ дакъкъасы: Оюн «Ким тез тапар?» (ресимлерге бакъып, исимлерге келишкен фииллерни тапып, арекетлерни косьтермек)

• «КЕЛЕДЖЕК ЗАМАН» АДАСЫ

Вазифе: Берильген фииллерни келеджек заманнынъ къатий ве даимийлик шекилинде язынъыз.

Сёзлер: азырламакъ, авуштырмакъ, дертлешмек, курешмек, шашмакъ, башламакъ, беклемек, пиширмек, беджермек, кочюрмек, кульмек, къурмакъ, къоркъмакъ, йырламакъ, бакъмакъ, ягъмакъ.

6.Нутукъ инкишафы дакъкъасы:

Вазифе: Фразеологик бирикмелернинъ манасыны тапмакъ. Фииллерни сечип, заманларыны бельгилемек (агъзавий шекильде).

1 группа:

Дёрт козьнен ёлгъа бакъа бир де бир шейге бакъты

Буруны шиширеджек бирисини пек беклей

Козь ташлады джаны агъыртаджакъ

2 группа:

Акъылындан чыкъты ачувланаджакъ, сёгюнеджек

Къулакъ асмады унутты

Иш кеседжек бир де бир шейге дикъкъат этмеди

3 группа:

Ичи-багъры яна бир де бириси келип лафнен вакътыны аладжакъ

Козь тийди бир де бириси къасевет эте, пек эеджанлана

Баш айландыраджакъ назарланды

• «ПЕКИТЮВ» ДУРАГЪЫ

Вазифе: Ресимлерге бакъып, еди фиильден джумлелер уйдурып олардан метин тизмек.

1 группа: шимдики заман фииллернен («Кузьнинъ тасвири»)

2 группа: кечкен заман фииллернен («Язнынъ тасвири»)

3 группа: келеджек заман фииллернен («Къышнынъ тасвири»)

(Талебелер язгъан метинлерни окъуйлар, къалгъан талебелер исе окъулгъан метинлерге къиймет кеселер, хаталарны тапалар ве группагъа баа къоялар)

7. Эв вазифеси:

1.с.60-62- окъумакъ, къаиделерни текрарламакъ;

2. с.62, 121-иш (джумлелерде олгъан фииллерни къайд этип, заман, дереджесини бельгилемек);

3.* «МОРФОЛОГИК ТРЕНИНГ» вазифесиндеки ишлетильген сезлернен къулланып, «Мектепте талебе озюни насыл тутмакъ керек?» мевзусында къаиделер тизмек.

8. Дерснинъ нетиджеси

Оджа: Бугуньки дерсте сизлер яхшы чалыштынъыз, чешит вазифелер беджерип, фииль заманларыны текрарладынъыз. Бизлер бераберликте чешит адаларда булундыкъ.

9. Рефлексия:

Дерснинъ нетиджесинде «Микрофон» усулынен къулланып озь фикирлеринъизни айтынъыз.

- Бугунь биз дерсте………………….огрендик (текрарладыкъ).

- Бугуньки дерсте мен……………бегендим.

- Дерсте энъ яхшы чалышкъан, догъру джеваплар берген –бу…………… (талебелер сыныфдашларнынъ джевапларына, дерсте чалышкъанларына къиймет кеселер)

10.Баалав (оджа чалышкъан талебелерге баа къоя, эксиклик олгъан ерлерни бельгилей).