«Ант эткенмен»
Ант эткенмен, миллетимнинъ ярасыны сармагъа,
Насыл олсун бу заваллы къардашларым инълесин?
Онлар ичюн окюнмесем, мугъаймасам, яшасам,
Юрегимде къара къанлар къайнамасын, къурусын.
Ант эткенмен, шу къарангъы юрткъа шавле
сепмеге,
Насыл олсун эки къардаш бир-бирини корьмесин?
Буны корип усанмасам, мугъаймасам, янмасам,
Козьлеримден акъкъан яшлар дерья-денъиз къан олсун.
Ант эткенмен, сёз бергенмен миллет ичюн ольмеге,
Билип, корип миллетимнинъ козь яшыны сильмеге.
Бильмей, корьмей бинъ яшасам, Къурултайгъа хан олсам,
Кене бир кунь мезарджылар келир мени коммеге.
САРЫ ТЮЛЬПАН
Ильк баарьни муджделеген сары
тюльпан,
Баре бойле солмасайдынъич бир заман.
Гузель ёсма гъондженъ иле эндамынъы
Эр кунь север, опер эдим сайгъыларман.
Гонълюмизни хошландырдынъ, сары тюльпан,
Мен де сени эльден, ельден къызгъанырман.
Узакълардан, коктен, ерден чокъ сюемен,
Кунешлернинъ, йылдызларнынъ козю яман.
Сары тюльпан, багъчамызны шенълендирдинъ,
Пек аз заман къырыкъ гонълюм эглендирдинъ.
Ярын сен де къырыладжакъ, оледжексинъ,
Оледжексенъ, бу дюньягъа ничюн кельдинъ?
«Къарылгъачлар дуасы»
Савлыкъман къал, татарлыкъ… Савлыкъман къал, татарлыкъ! Мен кетем дженнке, атымнынъ башы айланды ахирет бетке. Сенинъ ичюн яшадым, сенсиз ольсем, Бильмем, насыл кирермен бош дженнетке. Авдарылгъан алтавлар, тамулар ташкъан, Бу ишлерге биз тувул, мелеклер шашкъан, Хырпалангъан менликлер, хорлангъан къызлар, Баласын ташлап анайлар чёллерге къачкъан.. Артыма бакъсам - акъ омюр, алдымда - олюм, Коп узамаз беллиймен къарангъы ёлум. Къарсамбадан хавф этмей, кольгеден урькмей, Сонъ нефесте "татар" деп, узаныр къолум.