Конкурсная праграма ”Знаўцы мовы”

Конкурсная праграма”Знаўцы мовы”

(Усе вучні дзеляцца на каманды)

Ход мерапрыемства

Вучні чытаюць верш М.Пазнякова “Беларусь”

1-шы вучань

Усяму вядомы свету

Наш руплівы край здавён.

Тут на сонечных палетках

Спеюць бульба, жыта, лён…

2-гі вучань

Тут Дняпро бяжыць прывольна,

Сож, Бярэзіна, двіна, Прыпяць, Шчара, Свіслач, нёман,

Вілля, Піна,Буг, Дзвісна…

3-ці вучань

Тут крыштальныя азёры-

Нарач, Свіцязь, Снуды, Свір.

Полацк –наш найлепшы горад,

Віцебск, Тураў, Кобрын, Мір…

4-ты вучань

Тут сыны ляцяць у космас,

Песні матчыны пяюць…

Гэты край наш найдзівосны

Беларуссю ўсе завуць.

5-ты вучань. Бедны той, хто не мае скарбаў вечных- скарбаў душы. Такі скарб, каторы ніхто і ніколі адабраць у нас не здолее. – гэталюбоў да Бацькаўшчыны, да свайго народа, да роднай мовы.

6-ты вучань. Родная мова-душа народа. Пакуль жыве мова, жыве і народ.

7-мы вучань

Дык дзякуй, мой любімы край,

Што і ў мяне ёсць спадчына-

Зялёны стогалосы гай

І гэта мова матчына.

8-мы вучань.

А гэта вандроўка праз сёлы,

Праз край мой шырокі, вясёлы,

Бясконцыя нівы, дубровы-

У маю беларускую мову.

Вядучы. Добры дзень! Сёння мы сабраліся, каб зрабіць падарожжа па неабсяжнай Краіне Мовазнавіі, уладарка якой – Спадарыня Мова.

У адрозненне ад многіх казачных герояў яна не хавае сваіх багаццяў ад людзей, а, наадварот, шчодра дорыць кожнаму, хто толькі захоча іх мець.

У зале сабраліся мовазнаўцы, якія ведаюць усе сакрэты мовы.(Прадстаўленне каманд)

Конкурс” Назаві адным словам”

Даць агульную назву прапанаваным словам. За правільны адказ -1 бал

Пчала, жук, чмель (насякомыя)

Званочак, рамонак, васілёк (кветкі)

Верабей, ластаўка, сарока (птушкі)

Сукенка, спадніца, футра (адзенне)

Заяц, воўк, мядзведзь (звяры)

Чаравікі, боты, туфлі (абутак)

Конкурс “Складзі прыказку”

Кожная каманда атрымлівае канверт са словамі . За 2 хвіліны трэба скласці прыказку, прачытаць яе і растлумачыць сэнс. За правільны адказ-2 балы.

Пры сонейку цёпла, а пры мамцы добра.

Родная зямля мякчэйшая за чужую пярыну.

Найсмачнейшы хлеб ад сваёй працы.

Конкурс “Пагуляем у рыфмы: Жывы-нежывы”

Кожнай камандзе прапанаваны словы, якія абазначаюць назвы жывых прадметаў, да якіх трэба падабраць рыфму, каб атрымаўся нежывы прадмет. Напрыклад: рак-мак. За правільны адказ-1бал.

Казуля (кашуля) вожык (кошык)

Жабка (шапка) кошка (дошка)

Мышка (лыжка) ліска (міска)

Заданні для балельшчыкаў

Адгадаць загадкі

З гушчару зялёнага,

Дзе мошкі і цень,

На скалы ўзабраўся

Прыгожы …(алень)

У ваду нырае смела,

Хатку ён будуе ўмела.

Пад вадой і на вадзе

Будаўніцтва ён вядзе.

(Бабёр)

Ног няма, а хаджу.

Няма рота, а скажу:

Калі спаць, калі ўставаць,

Калі працу пачынаць

(Гадзіннік)

Даць агульную назву.

Сакавік, студзень, кастрычнік (назвы месяцаў)

Панядзелак, аўторак, серада (дні тыдня)

Лета, восень, зіма (поры года)

Ліпа, дуб, клён (дрэвы)

Агурок,фасоля, морква (агародніна)

Яблык, груша,сліва (садавіна)

Стол, шафа, ложак (мэбля)

Конкурс “Скорагаворкі”

Кожная каманда атрымлівае канверт са скорагаворкай. Вучні вызначаюць прадстаўніка ад каманды, які будзе прагаворваць скорагаворку ўслых. Улічваецца хуткасць, выразнасць, дакладнасць. На падрыхтоўку адводзіцца 2 хвіліны.

За адказ без памылак - 5 балаў, пры нязначнай недакладнасці - 4 балы, калі прачытаў з памылкамі – 3 балы, шмат памылак і недакладнасцей - 0 балаў.

Белы бусел баіў байку беламу зайку.

Жвавы вожык жыва жуку пашыў кажух.

Мілая мама мыла мылам малую Мілу.

Конкурс “ Наадварот”

Падабраць словы з супрацьлеглым значэннем. За кожны правільны адказ – 1 бал.

Ранак, зіма, высока.

Мяккі, часта, шырокі.

Чысты,ідзе, цяжка.

Конкурс”Школьны дыктант”

На аркушы паперы каманды запісваюць адказы, перадаюць журы. За кожны правільны адказ – 1 бал.

“Люстэрка” вучня (дзённік)

Прылада для пісьма (ручка)

Кніжка, дзе можна пісаць вучню (сшытак)

Мэбля ў класе для вучняў (парта)

Школьная сумка (партфель)

Чалавек, які дае веды дзецям (настаўнік)

Загадкі для балельшчыкаў

Што можна бачыць з заплюшчанымі вачыма?

Што плавае без вады?

Што ідзе без ног?

Што гарыць без полымя?

Хто стукае, грукае , а нідзе яго не відаць?

Якое імя расце ў жыце?

Выправіць памылкі.

“Малако дае карова”,-

Напісаў на кошцы Вова. (Дошцы)

Закрычаў Рыгорка:

”З неба ўпала горка!”(Зорка)

Назбіралася народу.

Дзіва , поўны вулей лёду. (Мёду)

Весела звініць збанок,

Кліча: “Дзеці на ўрок”. (Званок)

Не праедзем, дружа,

На дарозе ружа. (Лужа)

Кажа Славік Светцы:

“Цесна тыгру ў кветцы”.(Клетцы)

Конкурс “Наборшчыкі”

З прапанаваных літар скласці як мага больш слоў, запісаць на ліст паперы, перадаць журы. На падрыхтоўку адводзіцца 2 хвіліны. Каманда, у якой запісана большая колькасць слоў,атрымлівае 3 балы, астатнія – 2 балы. Дадатковы бал прысуджаецца камандзе, якая складзе самае доўгае слова.

А, К, Т, Ы, Г, А, Р, М, А (Граматыка)

Хвілінка-весялінка для балельшчыкаў

У школе

“Якую вы ведаеце драпежную птушку?” – запытала дзяцей настаўніца. Руку падняла Каця : “Камар! Бо ён смокча чалавечую кроў”.

Апетыт

Захварэла наша Рыта,

І не стала апетыту.

Выпраўляе мяне мама:

-Ты схадзі, сынок, у краму

І купі для хворай Рыты

Кілаграмчык апетыту.

Конкурс “Метаграмы”

У зыходным слове замяніць адну літару, каб атрымалася іншае слова. За правільны адказ – 2 балы.

З “м” расту я на градзе.

З ”р” я поўзаю ў вадзе.

(Мак-рак)

Калі на “д”- паверхі маю.

Калі на”л”- дзяўбу, ламаю.

(дом - лом)

З ”е” дружу з будаўнікамі.

З ”а”купляй у хлебнай краме.

(Бетон-батон)

Белы ўзімку, шэры летам-

Вось табе мае прыкметы:

“З” на “с” змяніць патрэбна,

Каб прадуктам быць мне хлебным.

(Зайка-сайка)

У лесе з “б”мяне шукаеш

І з прыемнасцю зразаеш.

Калі “б” на “п” заменіш-

Сцеражыся: захварэеш!

(Грыб – грып)

Я маю сцены і куты,

Усё жыццё служу табе.

Мне “о” на “ы” заменіш ты-

Тады шукай мяне ў трубе.

(Дом-дым)

Бачыць ты прывык мяне цякучай,

“Н” устаў – і стану я балючай.

(Рака-ранка)

Да ўзвышша зычную дадай-

Машыну ў “стойла” заганяй.

(Гара-гараж)

Конкурс “Дамашняе заданне”

Прачытаць на памяць верш пра Беларусь або беларускую мову, які падрыхтавалі дома. Улічваецца выразнасць, артыстызм, дакладнае веданне зместу. За добры адказ каманда атрымлівае 2 балы.

Журы падводзіць вынікі конкурсаў. Пераможцы ўзнагароджваюцца граматамі і прызамі.