Механикалык термелүүлөр жана толкундар - 1

Узундугун 4 эсе кичирейтип, ал эми амплитудасын 2 эсе көбөйткөн  кезде термелип жаткан маятниктин толук механикалык энергиясы канча эсе өзгөрөт?

Термелип жаткан пружинанын  t = Т/8  убакыт моментиндеги  кинетикалык жана потенциалдык энергиясынын катышын тапкыла.

Нерсе максималдык мааниси 2 Н болгон квазисерпилгич күчтүн таасири астында гармоникалык термелүү кыймылын жасайт. Нерсенин термелүүсүнүн толук энергиясы 0,1 Дж болсо, анда анын термелүүсүнүн амплитудасын тапкыла.

Узундугу 1 м болгон керилбес жипке массасы  0,4 кг болгон нерсе илинген. Нерсени тең салмактуулук абалынан 60⁰ ка кыйшайткан кезде анын потенциалдык энергиясы канчага чоңойду?

Катуулук коэффициенти 500 Н/м болгон пружинага илинген жүктүн термелүү амплитудасы 4 см. Пружинанын толук механикалык энергиясын тапкыла.

Резонанстык жыштыгы 440 Гц болгон камертондун өздүк термелүүсүнүн мезгилин тапкыла.

Маятниктин өздүк термелүүсүнүн мезгили 0,5 с. Резонанс болушу үчүн маятникке кандай жыштыктагы мезгилдүү күч таасир этиши керек?

Термелүү системасына мезгилдүү өзгөрүүчү, жыштыгы 50 Гц болгон сырткы күч таасир этет. Бул термелүү системасынын аргасыз термелүүсүнүн резонанс учурундагы жыштыгы эмнеге барабар ?

Өздүк термелүү жыштыгы 0,5 Гц болгон математикалык маятник вагондун төбөсүнө илинип коюлган. Рельстердин узундугу 12,5 м. Вагон кандай ылдамдык менен кыймылдаганда дөңгөлөктөрдүн рельстердин бириккен жерине урунушунун натыйжасында маятник өзгөчө катуу термеле баштайт?