Тэма: Я і мая школа. Вучэбныя рэчы
Мэты:
вучыць вымаўляць гук [ў];
пазнаёміць са словамі і выразамі тэматычнай групы “Вучэбныя рэчы”, прывучаць ужываць іх у маўленні;
фарміраваць уменне асэнсаванага ўспрымання тэкст на слых, вучыць адказваць на пытанне, карыстаючыся словамі самога пытання;
садзейнічаць развіццю фанематычнага слыху, слухавую памяць;
выхоўваць акуратнасць, ашчаднасць да вучэбных рэчаў.
Абсталяванне: падручнік “Беларуская мова 1 клас”, рабочы сшытак, каляровыя алоўкі, малюнкі.
Ход урока
Арганізацыйны момант
Весела гучыць званок, яго голас нам знаёмы,
Запрашае на ўрок беларускай мовы!
Актуалізацыя ведаў і ўменняў вучняў
Работа па дэманстрацыйных малюнках «Настаўніца», «Вучань», «Вучаніца».
- Назавіце па-беларуску тых, хто адлюстраваны на малюнках, і адкажыце, што яны робяць.
Гульня «Азбука саду і агарода»
Знайдзіце сярод прадметных малюнкаў выявы, у назвах якіх ёсць гук [г]:
гарох груша гарбуз агрэст
агурок вішня морква цыбуля
Паведамленне мэты і задач урока. Маўленчая размінка
Назіранні за вымаўленнем і вымаўленне ізаляванага гука
Паслухайце, як я вымаўляю словы і скажыце, якія гук апошні: пісаў, заснуў, лічыў. (Беларускае слова пісаў параўноўваецца з рускім “писал”).
Якое слова вам было незразумелае? (Лічыў — считал.)
У беларускай мове ёсць гук [ў]. Ён вымаўляецца коратка. (Вучні за настаўнікам вымаўляюць ізаляваны гук [ў].)
Гульня «Рэха»
Настаўнік называе слова, вучні «рэхам» яго паўтараюць, потым адказваюць, у якім месцы слова чуецца гук [ў]: доўга, паўтараў, лічыў, пісаў, заснуў.
Якія словы вы не зразумелі? (Настаўнік тлумачыць значэнне названых слоў.)
Вылучэнне слоў з вывучаемым гукам
Паслухайце верш.
Доўга ўрокі Стась вучыў,
Паўтараў, пісаў, лічыў,
Замарыўся так, бядак,
Што заснуў на крэсле ўсмак.
Як звалі хлопчыка?
Што рабіў Стась? Чаму ён заснуў?
Назавіце словы з гукам [ў].
А цяпер будзем вучыцца правільна вымаўляць словы з гукам [ў] у вершы. (Кожны радок вымаўляецца хорам.)
Фізкультхвілінка
Вывучэнне новай тэмы
Уступная гутарка
Лексічная праца над матэрыялам: вучэбныя рэчы, падручнік, сшытак, аловак, ручка, гумка, ранец, пенал, пісаць у сшытку, чытаць у падручніку, разглядваць у падручніку, сачыць па падручніку, складваць у ранец, пісаць ручкай.
- Сёння мы пагаворым пра тое, як трэба правільна вучыцца (не так, як Стась) і пра вучэбныя рэчы, якія патрэбны кожнаму вучню.
Гульня «Назаві прадмет»
Настаўнік паказвае прадмет, вучні называюць яго па-руску, а настаўнік — па-беларуску: сшытак, падручнік, пенал, ручка, аловак, фламастар, гумка, ранец. Калі вучні ведаюць назвы прадметаў па-беларуску, то трэба дазволіць ім выказацца,
Якія назвы прадметаў падобныя ў рускай і беларускай мовах?
Якія назвы прадметаў адрозніваюцца?
Як назваць усе гэтыя прадметы? (учебные вещи - вучэбныя рэчы)
Паслухайце верш. Паказвайце рэчы, якія ў ім названы.
Зірні ў партфель...
Вось бачыш — сшыткаў шмат,
Вось ручка і буквар, .
Пенал, алоўкаў рад. (М. Чарняўскі).
У якім слове ёсць гук [ў]? (Настаўнік з дзецьмі завучвае на памяць верш, паказваючы прадметы-арыенціры.)
Работа з дэманстрацыйным малюнкам
- Разгледзьце малюнак на дошцы. Каго вы бачыце на малюнку? Якімі вучэбнымі рэчамі карыстаюцца вучні?
Работа па падручніку (с. 8, заданне 1)
Паслухайце верш. Куды збіраецца дзяўчынка?
Падручнікі, сшыткі
Купіла мне мама.
У школу з сябрамі
Пайду я таксама. (Я. Шыбут).
Якія прадметы ёй могуць спатрэбіцца ў школе?
Назавіце спачатку тыя, якія вы ўжо можаце назваць па-беларуску. Пра назвы астатніх запытайцеся ў мяне.
Работа ў сшытку (урок 3, заданне 2, с. 6)
Разгледзьце малюнак. Што робіць вучаніца?
Якія вучэбныя рэчы ляжаць на парце?
Абвядзіце, контуры гэтых прадметаў і назавіце іх.
Замацаванне
Работа па падручніку (с. 8, заданне 2)
Пакладзіце далоні на падручнік так, каб былі бачныя толькі першыя тры прадметы. Назавіце іх. (Ручка, аловак, фламастар.) Паслухайце загадку, выберыце з гэтых прадметаў адгадку. (Астатнія прадметы — аналагічна.)
Што за дрэва ў свеце ёсць,
Што дупло ў яго наскрозь,
А ў дупло забраўся пісар:
Вечна піша і маўчыць,
Ростам гэткі ж, як і дрэва,
Толькі нос з дупла тырчыць? (Н. Гілевіч)
З сяброўкай моцна я дружу,
У школы разам з ёй хаджу.
Заўсёды буду я дружыць:
Яна на свеце вучыць жыць! (Н. Гілевіч.)
Я — гарэза і свавольнік,
За плячамі я катаюся.
З году ў год, нібыта школьнік,
Кніжак, сшыткаў не цураюся. (М. Сівец).
Работа па падручніку (с. 9)
Падрыхтоўка да слухання
Разгледзьце малюнкі. Што здарылася? Дзе адбываюцца падзеі? Чым займаюцца дзеці? Паглядзіце на апошні малюнак. Які там хлопчык? Па-беларуску кажуць «пачырванеў». Паслухайце і скажыце, чаму пачырванеў Вадзік.
Слуханне тэксту. Пры чытанні вучні разглядаюць малюнак.
Чаму пачырванеў Вадзік?
У класе ціха-ціха. У першакласнікаў урок малявання. Учора яны хадзілі з настаўніцай у лес, а сення Ніна Пятроўна сказала, каб кожны намаляваў тое, што яму больш спадабалася ў лесе.
Вадзіку спадабаўся грыб мухамор. А Вадзікава суседка Верачка намалявала рабіну. Яна так захапілася работай, што нават высунула кончык языка. Але вось бяда: не паспела Верачка намаляваць і паловы, як раптам – трах! - зламаўся яе чырвоны аловак. (Пакажыце чырвоны аловак.)
-Вадзік, дай мне сваю тачылку, у мяне аловак зламаўся, - папрасіла Верачка свайго суседа.
-А дзе твая? – строга запытаў Вадзік.
-У мяне няма.
-Чаму ж ты мне пра гэта ўчора не сказала? Я б табе сваю старую тачылку прынес. Яна крыху ступілася, але аловак яшчэ затачыць можна. Заўтра я табе яе прынясу.
-Мне трэба зараз, а не заўтра, - пакрыўдзілася Верачка.
-А дзе ж я табе зараз яе вазьму? Яна ж у мяне дома засталася.
-Дык у цябе ж вунь новая тачылка ляжыць, - сказала Верачка.
-Э, не! – пакруціў галавой Вадзік. – Новую я табе не дам. Калі я пачну даваць яе ўсім, яна хутка ступіцца, - і ен схаваў тачылку ў пенал.
-Жмінда! – сказала Верачка і заплакала.
-Верачка, чаго ты плачаш? – запыталася настаўніца?
-Мой чырвоны аловак зламаўся… Чым жа я цяпер ягадкі намалюю на сваей рабіне? – усхліпнула Верачка.
Настаўніца абвяла вачыма прыціхлы клас і запытала:
-Дзеці, хто можа даць Верачцы свой чырвоны аловак? (А вы б далі свій аловак?)
І не паспела яна сказаць гэта, як да Верачкі з усіх бакоў пацягнуліся рукі з алоўкамі. Кожны хацеў дапамагчы Верачцы.
Толькі адзін Вадзік нібы нічога не чуў і не бачыў. Ен схіліўся над сваім сшыткам, а вушы яго раптам сталі чырвоныя – чырвоныя.
(Паводле Я. Бяганскай).
Адказ на пытанні вучняў пра незразумелыя словы
Суразмоўніцтва па змесце апавядання
Чаму пачырванеў Вадзік?
Якая бяда здарылася ў Верачкі?
Хто ёй дапамог?
Раскажыце па малюнках, што адбывалася ў класе.
Ці здараецца такое ў вас? Вымавіце словы з гукам [ў] (выдзелены ў тэксце).
Гульня «Блытанка»
Настаўнік задае пытанні і ў якасці адказу падымае не той прадмет. Вучні павінны паказаць прадмет правільна і назваць яго хорам па-беларуску.
Чым малююць у альбоме, сшытку? (Настаўнік паказвае гумку.)
Чым пішуць у сшытку? (Настаўнік паказвае фламастар.)
Чым выціраюць напісанае ці намаляванае алоўкам? (Настаўнік паказвае ручку.)
Работа ў сшытку (урок 3, заданне 1)
Назавіце прадметы на малюнку па-беларуску.
Абвядзіце толькі тыя прадметы, якія вы пакладзяце ў школьны ранец. Як іх можна разам назваць? (Вучэбныя рэчы)
Вынік урока.
З вымаўленнем якога гука мы пазнаёмідіся на ўроку?
Назавіце словы з гэтым гукам.
Пра каго вы слухалі тэкст?
Якія беларускія словы запомнілі?