Дзяржаўная ўстанова адукацыі
«Сярэдняя школа №14 г.Ліды»
ВУЧЭБНЫ ЗАНЯТАК
ПА БЕЛАРУСКАЙ ЛІТАРАТУРЫ (ЛІТАРАТУРНАМУ ЧЫТАННЮ)
ПА ТЭМЕ: «В. СУХАМЛІНСКІ “СІВАЯ ВАЛАСІНКА”
III «Б» КЛАСС
2016/2017 НАВУЧАЛЬНЫ ГОД
Каспар Лілія Генрыхаўна,
педагог на I-й ступені навучання,
першай кваліфікацыйнай катэгорыі
Мэта: фарміраваць у вучняў навык свядомага чытання; садзейнічаць асэнсаванню ідэі твора праз змест, удасканаленню ўмення аналізаваць тэкст.
Задачы:
адукацыйныя:
садзейнічаць фарміраванню ў вучняў навыка арфаэпічна правільнага і асэнсаванага чытання;
фарміраваць уменне прагназаваць змест твора па яго назве, ключавых словах;
ствараць умовы для ўзбагачэння і актывізацыі слоўнікавага запасу вучняў;
развіваючая:
спрыяць развіццю ўвагі, лагічнага мыслення;
выхаваўчая:
садзейнічаць выхаванню станоўчых рыс характару, павагі да маці.
Абсталяванне: мультымедыйная прэзентацыя, музыка, карткі з заданнямі.
Ход урока
I. Арганізацыйны этап. (Слайд №1.)
Празвінеў ужо званок,
Пачынаецца ўрок!
Будзем добра працаваць.
Думаць! Слухаць! Разважаць!
Жадаю вам добрага настрою і поспехаў на ўроку!
II. Гукавая размінка.
1.Чыстагаворка. (Слайд №2.)
Мы-мы-мы – працуюць нашы… (мамы).
Му-му-му – я люблю сваю … (маму).
Ам-ам-ам – віншуем мілых … (мам).
Ам-ам-ам – маму пакрыўдзіць … (не дам).
2.Скорагаворка (Слайд №3.)
Мілая мама мыла мылам малую Мілу.
Чытанне з дакладным вымаўленнем кожнага слова.
Вымаўленне скорагаворкі з націскам на другім слове (для дзяўчынак), на апошнім (для хлопчыкаў).
Павольнае вымаўленне скорагаворкі.
Вымаўленне скорагаворкі ў сярэднім тэмпе.
Хуткае вымаўленне скорагаворкі (2 разы).
III. Праверка дамашняга задання. (Слайд 4.)
Выразнае чытанне верша Э.Валасевіча “Хлопчык і кацянё” (с.65-66)
Выразнае чытанне дадзенага верша на памяць (па жаданні вучняў)
Ацэньванне вучняў.
IV. Уводзіны ў новую тэму.
Падрыхтаваная вучаніца пад музыку чытае верш.
Хто сказаў: “Даволі сну!”? Хто касічкі мне заплёў?
Хто сказаў: “Уставаць пара!”? Цэлы дом адзін падмёў?
Кашу хто паспеў зварыць? Хто мяне пацалаваў?
Чаю ў чашку мне наліць? Хто дзіцячы любіць смех?
Хто на свеце лепш за усіх?
Адказы вучняў. (Мама.)
Мама… Закрыйце вочы і прыслухайцеся. Вы пачуеце мамін голас. Ён жыве ў вас саміх, такі знаёмы, такі родны.
А бывае так, што вы засмучаеце маму, нават калі не жадаеце гэтага? (Адказы вучняў.)
V. Знаёмства з творам Васіля Сухамлінскага “Сівая валасінка”.
- Сёння мы пазнаёмімся з апавяданнем Васіля Сухамлінскага “Сівая валасінка”. З гэтым аўтарам на ўроках літаратурнага чытання мы сустракаемся ўпершыню. (Слайд №5.) Па-гэтаму зараз запрашаю паглядзець праграму “Жыццё выдатных людзей”, каб больш інфарамацыі атрымаць пра аўтара. Вядзе праграму…
Выступае падрыхтаваны вучань. Дэманструюцца слайды.
Вучань. (Слайд №6.) Васіль Сухамлінскі нарадзіўся 28 верасня 1918 года ў мястэчку Васільеўка, якое знаходзіцца ў суседняй з Беларуссю краіне - на Украіне. Тут прайшлі яго дзяцінства і юнацтва.
Нягледзячы на тое, што Васіль Сухамлінскі рос у беднай сям’і, ён атрымаў добрую адукацыі: скончыў школу, а затым педагагічны інстытут.
(Слайд №7.) У 17 год пачаў працаваць настаўнікам, выкладаў украінскую мову і літаратуру.
Калі пачалася вайна ў 1941г., Сухамлінскі дабравольцам пайшоў на фронт. Абараняючы Маскву, ён быў цяжка паранены, і толькі цудам застаўся жывы.
Пасля вайны Васіль Сухамлінскі стаў дырэктарам Паўлышскай сярэдняй школы, якой нязменна кіраваў да канца свайго жыцця.
(Слайд №8.) Сухамлінскі пісаў як для дзяцей, так і для дарослых.
(Слайд №9.) Творы для дзяцей выдадзены ў зборніках “Няхай будуць салавей і жук”, “Кветка сонца”, “Усе добрыя людзі – адна сям’я” і інш. на рускай і ўкраінскай мовах.
(Слайд №10.) Кніга яго жыцця – “Сэрца аддаю дзецям”.
Апавяданне, з якім мы пазнаёмімся на сённяшнім уроку, перакладзена на беларускую мову.
(Слайды №№11- 13) – дапаўняе настаўнік (“Узнагароды”, “Памяць аб В.А. Сухамлінскім”).
А цяпер настаў час пазнаёміцца з творам аўтара. (Слайд №14.)
Прагноз.
Прачытаўшы ключавыя словы, выкажыце, калі ласка, сваё меркаванне, аб чым пойдзе гутарка ў творы. (Адказы вучняў.)
Матчына каса, тры сівыя валасінкі, здзівіўся, чатыры сівыя валасінкі, сэрца забалела.
Чытанне апавядання В.Сухамлінскага “Сівая валасінка” настаўнікам (с. 67-68)
- Ці спраўдзіўся ваш прагноз? (Адказы вучняў.)
- Назавіце галоўных герояў апавядання. (Мама і хлопчык Міхась.)
Чытанне тэксту вучнямі самастойна (шэптам).
Аналіз зместу апавядання.
Што ўбачыў Міхась у матчынай касе? (Тры сівыя валасінкі.)
Што змянілася ў матчынай касе праз некалькі дзён? Адказ падцвердзіце радкамі з тэксту. (“Праз колькі дзён Міхась глянуў на матчыну касу і ўбачыў у ёй чатыры сівыя валасінкі.”)
Ад чаго сівеюць матчыны валасінкі? (Ад болю.) Прачытайце.
Ад чаго балела матчына сэрца? Падцвердзіце радкамі з тэксту. (“Памятаеш, ты палез на высознае-высознае дрэва… Я зірнула ў акно, убачыла цябе на тоненькай галінцы. Сэрца забалела, і валасінка пасівела…”)
Што магло здарыцца з Міхасём? (Бяда. Хлопчык мог бы сур’ёзна параніцца, зламаць руку ці нагу.)
Ці зразумеў Міхась, ад чаго балела сэрца ў маці? (Не.)
З якіх слоў Міхася гэта зразумела? Прачытайце. (“Мама, а калі я на тоўстай галіне буду сядзець – валасінка не пасівее?”)
Падумайце і адкажыце сваімі словамі,што трэба рабіць, каб не сівелі валасы ў маці. (Адказы вучняў.)
Як вы лічыце, ці толькі маці трэба берагчы, гаварыць добрыя словы, адносіцца з павагай? (Да родных, блізкіх, знаёмых, аднакласнікаў, настаўнікаў і інш.)
Тое, што здарылася з Міхасём, магло здарыцца і з вамі. З годнасцю паводзіць сябе ў розных абставінах павінен вучыцца кожны.
Фізкультхвілінка
Бінарнае чытанне. (Дадзены тэкст чытаюць два вучні адначасова.)
Работа ў парах
Заданне: выключыце лішнія словы ў сінквейне. (Слайд №15.)
Маці.
Цярплівая, крыклівая, ласкавая. (Чаму?)
Усміхнулася, пасівела, задрамала, спалохалася. (Чаму?)
У маці самае чулае сэрца. (Чаму?)
Любоў, сімпатыя. (Чаму?)
Чытанне апавядання па ролях.
Работа ў групах
Заданне для 1 групы: (Слайд №16.)
Састаўце кластэр на тэму “Мама”. “Гронкі” прадстаўце ў выглядзе слоў-эпітэтаў.
МАМА
Заданне для 2 групы: (Слайд №17.)
Паспрабуйце скласці “рассыпаныя” прыказкі пра маці і растлумачыць іх.
пры маці добра.
Пры сонейку цёпла,
не грэе.
Дарагая тая хатка,
заўсёды мяккія.
Матчыны рукі
дзе радзіла мяне матка.
Заданне для 3 групы: (Слайд №18.)
Паспрабуйце вырашыць праблемыя сітуацыі.
Іван заходзіць у пакой і гаворыць ціхім голасам: “Мама, ідзі хутчэй на кухню, паглядзі, там вада разлілася”.
– Чаму хлопчык гаворыць ціхім голасам?
– Што на гэта скажа маці?
Святлана вельмі не хацела рана ўставаць і ісці ў школу. Яна сказала сваёй матулі: “Мамачка, у мяне баліць жывот. Я захварэла”. Маці захвалявалася і прапанавала дачцэ горкае лякарства.
– Як вы думаеце, што далей скажа Святланка сваёй маме?
– Што зрабіла маці?
Заданне для 4 групы: (Слайд №19.)
Дапішыце верш.
Ласкавая, мілая, _________________ (светлая),
Любімая мама ____________ (мая).
Яна, як бярозка, ________________ (прыветная),
Што свеціцца ________________ (ля ручая).
(Галіна Дашкевіч)
А зараз пазнаёмімся з рэзультатамі работы кожнай групы.(Слайд №20.)
Справаздача работы груп. Падвядзенне вынікаў работы ў групах.
Ацэньванне вучняў.
VI. Падвядзенне вынікаў вучэбнай дзейнасці.
Які твор чыталі на ўроку?
Хто аўтар?
Чаму вучыць гэты твор?
Як вы думаеце, ці патрэбна маці дарослыс людзям?
VII. Рэфлексія. (Слайд №21.)
(Вучні па чарзе дапаўняюць прапанаваныя сказы.)
На ўроку:
мне больш за ўсё спадабалася …
я магу пахваліць аднакласнікаў за …
мне было цяжка …
VIII. Тлумачэнне дамашняга задання. (Слайд №22.)
Навучыцца выразна чытаць твор “Сівая валасінка”.
На стале заданні: карткі рознага колеру.
Белы колер: скласці расказ пра сваю маму.
Чырвоны колер: знайсці і вывучыць на памяць 2 прыказкі аб маці, умець растлумачыць іх сэнс.
Зялёны колер: скласці сінквейн пра сваю маму.
Дзякую за працу! (Слайд №23.)